WILLEMSTAD, 27 di mei 2024 – Curaçao Medical Center (CMC) ta introdusí un sistema online nobo pa hasi petishon di historial médiko. Awor pashèntnan por fásilmente hasi nan petishon pa un kopia di nan historial médiko via di nos wèpsait usando e formulario digital.
E sistema nobo aki ta yuda pa ‘’streamline’’ e proseso i pa hasi esaki mas aksesibel pa pashèntnan. Pues, enbes di bishitá e hòspital personalmente, pashèntnan por yena e formulario di petishon online i risibí esaki den 4 dia di trabou. Pashèntnan por skohe pa buska e kopia di nan historial médiko personal na Curaçao Medical Center òf digital via di un e-mail segurá i enkriptá.
E formulario digital ta garantisá un proseso mas lihé i mas efisiente pa tantu pashènt komo personal di hòspital. Ora e petishon a wòrdu prosesá, e pashènt lo risibí un notifikashon via e-mail ku e kopia di nan historial médiko òf un yamada indikando ku nan petishon ta kla. Pa mantené e standart di siguridat i konfidensialidat, e kopia di historial médiko ta wòrdu entregá despues di verifikashon di identifikashon di e pashènt i òf representante di e pashènt.
CMC ta keda dediká na duna servisionan di kuido ekselente i pa kontinuamente mehorá eksperensia di pashènt. Nos ta kere ku e sistema nobo akí di hasi petishon online pa historial médiko, lo mehorá e komodidat i aksesibilidat di nos servisionan.
Nos ta apresiá boso koperashon i komprenshon mientras nos ta transishoná pa e sistema nobo aki.
Pa mas informashon òf pa hasi un petishon, klek aki
