WILLEMSTAD, 26 di aprel 2024 – Durante un entrevista resien na TV 13 ku a tuma lugá djárason 24 di aprel 2024, señor Gilbert Martina a anunsiá públikamente ku e lo no bai ekstendé su kontrato laboral ku Curaçao Medical Center (CMC). Sinembargo esaki no ta bin komo sorpresa teniendo kuenta ku esaki a ser menshoná durante e enkuesta parlamentario di 12 di mart 2024.
Di akuerdo ku e statutonan, hunta di supervishon tin e outoridat pa apuntá un direktor pa un término di 4 aña, ku un máksimo di 2 término di 4 aña kada un. E entidatnan a ser establesí na febrüari di 2018, kual ta indiká ku e promé término di e direktor apuntá lo tabata di 2018 pa 2022 i e siguiente di 2022-2026. Sinembargo, señor Martina ya tabata aktivo durante e periodo di transishon for di òktober 2017.
Aunke no tabatin un statuto durante e periodo aki, Sr. Martina ta konsiderá òktober 2017 e inisio di su empleo. Konsekuentemente, Sr. Martina ta konsiderá e periodo di òktober 2017 te òktober 2021 komo un periodo di 4 aña trahando pa CMC. Su siguiente término lo ser konsiderá di òktober 2021 te òktober 2025. Pues, mirando ku e kontrato di empleo di Sr. Martina ta terminá na yüni 2025, ya e lo sirbi kasi 8 aña den su posishon komo direktor
Biniendo for di su balornan fundamental, sr. Martina ta enfatisá e importansia pa hunta di komisario kuminsá e trayekto proaktivamente pa yega na un kadidato kapasitá, pa sigui ehekutá e liña di maneho pa guia CMC pa bira e mihó hòspital den Karibe i potensialmente un di e mihó hòspitalnan na mundu.
Ta importante pa enfatisá ku sr. Martina su desishon ta independiente di polítika. Su desishon ta resultado di su rèspèt pa e statutonan ku ta preskribí ku un persona por sirbi un máksimo di 8 aña komo direktor di nos hòspital. Adishonalmente, su prinsipionan kual ta boga pa kambio di direktor periodikamente, espesialmente pa funshonan den entidat publiko ku tin un impakto grandi riba nos kumindat manera nos hòspital.
