Willemstad, – 1 di Desèmber, 2023 – Curaçao Medical Center (CMC) a finalisá un kurso di “Teach the Teacher” pa spesialistanan ku a resultá hopi eksitoso. E programa ku a tuma lugá for di 27 di novèmber te ku 1 di desèmber tabata dirigí pa mehorá e abilidat di e spesialistanan médiko ku tin responsabilidat di duna entrenamentu i enseñansa na hospital. E kurso aki, akreditá pa Hulanda, a keda organisá pa Netherlands-Caribbean Foundation for Clinical Higher Education (NASKHO) i a kontá ku instruktornan eksperto for di University Medical Center of Groningen (UMCG). E programa aki a keda ofresé na CMC,
siendo un hospital afiliá di UMCG.
E meta di e kursonan ta pa guia spesialistanan den nan ròl di entrenadó na CMC pa adoptá bon práktikanan den enseñansa i guia. Un di e kursonan tambe tabata dediká na stazjèrnan médiko di CMC i residentenan médiko.
E seshonnan a konsistí di un kombinashon di diskushonnan interaktivo, ehersisio práktiko, i ehèmpelnan real, kuminsando for di instrukshonnan básiko te na esnan mas kompliká di diagnóstiko médiko. Partisipantenan ta’tin e oportunidat pa traha den grupo chikí, partisipando den ehersisionan práktiko dunando instrukshon, guia, i feedback konstruktivo.
E enfoke primario di e kurso tabata pa fortifiká i mehorá e akshonnan didáktiko di e spesialistanan, pa nan por organisá un ambiente di enseñansa strukturá, sigur i efektivo den nan práktika diario. E énfasis riba métodonan i téknikanan di enseñansa tabata dirigí pa mehorá e klima edukativo kompletu na CMC.
Profesor Dr. Ingemar Merkies, Direktor Médiko di CMC, a enfatisá e importansia di e programa. “Teach the Teacher ta yuda koleganan forma un konekshon mas fuerte i ta guia spesialistanan pa transmití informashon mas mihó, duna informashon balioso na pashènt, i tin empatia ku tur nivel di studiante, kolega, òf pashènt. Tambe ta reforsá un klima mas edukativo na CMC,” el a menshoná.
E abilidatnan atkirí durante e entrenamentu ta bai mas leu di e interakshon dirèkt ku residentenan médiko i estudiantenan. Nan ta benefisiá otro koleganan tambe, manera enfermeronan, ku por risibí instrukshon balioso, i krea un ekipo di kuido mas koherente i efektivo.
E ehekushon eksitoso di e kurso “Teach the Teacher” ta suprayá e kompromiso di CMC pa desaroyo profeshonal kontinuo i pa elevá e standart di edukashon médiko. E kolaborashon ku NASKHO i UMCG ta reflehá dedikashon pa trese ekspertisio di klase mundial na Korsou pa benefisio di profeshonalnan médiko i e kalidat di kuido na pashènt.
